Hallo ihr Liäbe
 
Sitem letschte Blog hemer wiider viel dörfe erläbe und sind adä Westküste wiiter richtig norde gfahre. D Landschaft isch eifach au da wieder wunderschön. Leider hämmer zwüscheziitlich euis au müesse um dihei kümmere was euisi freud am Reise aber nöd minderet. Da gschwind es danke schön a dihei wo euis dä Rugge frei haltet und mer eifach chönd Reise.


Nach L.A. hemer na en Halt gmacht bimene Six Flagg Park (Achterbahne Park) isch mega kuul gsi. Het echt höchi und schnälli Bahne, USA halt. Wiiter simmer ufem Hwy 1 nach Santa Barbara wo mer übernachted hend. Nächsti Halt isch in Morro Bay gsi, wo es herzigs Dörfli isch direkt am Meer. Hend sogar en Otter gseh mitemene Baby Otter...jöööh. Wiiter de Küschte nah hemmer undrwegs immer wieder mal en churze Halt gmacht und die schön Ussicht gnosse. In Santa Cruz hemer den 2 ganzi Täg verbracht. Mega kuule Beach Sidewalk hets mit vielne chline Ässensständ, Souvenier Läde und Achterbahne. Sind en Tag am Beach ghängt und hends schöne Wetter gnosse. Am Fritig de 20.6. hemer natürlich de Match CH-FRA gluäget innere Sports Bar. Isch lässig gsi au wänd CH verlore het. Mit voller Vorfroid simmer am 22.6 Richtig San Francisco. Oises Ziil isch de Flughafe SFO gsi. Det isch am 16 Uhr d Sonja glandet. Mitemne grosse Welcome Schild hemer si empfange. In San Francisco hämmer Sightseeing gmacht mitem Hop on Hop off Bus. Golden Gate, Fisherman Warf, Union Square, Lombard Street und vieles vieles mehr hemer gseh. Hend sogar na es Ticket chöne ergattere zum uf Alcatraz zcho. Uf dere Gfängnis Insle hemer eh Audio Tour chöne mache und spannendi Infos becho. Natürlich simmer au mitere Cable Car gfahre was recht kuul gsi isch. Die Stadt isch uf jede Fall en bsuech wert. Ufem Weg wiiter hemer ois nid näh lah na husch die berühmti, kurvigi Lombard Street mitem Auto abezfahre. Wiiter adä Westküste na isch euise nächsti Halt Fort Bragg gsi. Vo det isch dä Weg witer nach Eureka gange wo mer na en Halt gmacht bim Drive Thru Tree. Da isch den kuul gsi, mitem Auto duur de Baum fahre. Dä Adi het das super gmacht mitem dure zirklä. Nach Eureka simmer dure de Redwood NP, wos riesig Bäum het, gfahre. i Däm Park sind nid die dickste aber die höchste Bäum vo dä Erde. Im Moment simmer in Brookings, emene chline Dörfli am Hwy 1. Wiiter gat denn de ganze Küschte entlang bis nach Portland und vo det den via Mount Rainier richtig Seattle.

Mir hoffed oi allne gats guet.

Schicked vieli liäbi Grüäss it Schwiiz
Nadia und Adi (mit Sonja :) )

Fötelilink:
https://plus.google.com/photos/106485234849145601756/albums/6029817841832072817?authkey=CI6ejoKe2KLF...