Hallo Ihr liebe Lüt dihei.
Mir mälded euis wider mal mit eme Blog itrag und föteli. Zur
ziit simmer grad in Vancouver und lueged dä Unertgang vo Brasilie.
Wo mer letscht mal gschribe händ simmer na adä Westküste idä
USA gsi. Die simmer au na bis höchi Portland witer gfahre aber dän hämer s Meer
verlah und sind nach Portland gfahre. Det häts na es riesigs Outlet Center gah
wo mer sind go shoppe. In Portland sälber simmer nur ei Nacht gsi. D Stadt hät
na en schöne idruck gmacht. Witer simmer dän vo det am Columbia River richtig
Oste gfahre, dä hämer aber wider verlah und sind na uf Yakima bim Mount Rainier
NP gfahre. Det simmer ei Nacht gsi. Es isch au wider mal warm gsi nid so wie
adä Westküste. Vo det isches dän in Nationalpark gange. Dä Park isch wunderschön
aber leider nid ganz eso speziell wie all die wo mer scho bsuecht händ. Es
gseht hauptsächlich us wie idä schwiz. Natürlich häts det au wider mal Schnee
gah. Übernachtet hämer usserhalb vom Park in Packwood, das Dorf isch so gross
das mers nid mal uf Wikipedia findet. Vo det us isch dän die letzti langi Fahrt
mit euisem schöne Mietauto nach Seattle gange. In Seattle hämer s Auto am
Flughafe wider müesse abgäh. Mir sind sehr froh das mer abgseh vom Autotusch
kei einzigi Panne oder susch Problem gha händ. Wer jemals sötti nach Seattle gah
däm chömer s Hotel Five sehr empfehle. D Stadt hämer z Fuess guet chöne
erchunde. Am 4. Juli simmer idä Stadt an Union Lake go Führwerk luege. Zu
euisem erstuhne isch die ganzi Fiir vo dä Amis nöd so patriotisch gsi wie mer
sich das Vorstellt. Es isch aber glich schön gsi. Ein Tag hämer na chöne Velos
vom Hotel gratis ha. Mit däm simmer an Hafe und zum Space Needle. Mir händ aber
d Usicht uf d Stadt nid vom Space Needle us gnosse sondern sind uf dä Columbia
Tower wo s höchste Gebäude idä Stadt isch. Au hämer na e Underground Tour in
Seattle gmacht. Also das heisst, dass am Ufer vo Seattle d Stadt mal 2 Stöck
tüfer gläge isch als hüt. Wilne aber immer s Abwasser bi Fluet wider s WC uecho
isch und si nacheme Brand wider alles händ müesse ufbaue, händs d Hüser mind. 4
Stöckig gmacht und die erste 2 Stöck sind etz dä Chäller. Das wills d Strass um
die 2 Stöck ufgfüllt händ damit s Abwasser nüme id Hüser gloffe isch. Und etz
chamer im Untergrund na die alte Hüseriigäng und uf dä alte Trottoir ume
laufe. In Seattle hämer au leider scho
wieder müesse abschid näh vo dä Sonja. Mit euisne Souvenier hät sie wider
müesse hei. Mir sind au witer nach Vancouver. Die Strecki hämer im Zug gmacht.
Isch na schön gsi, will s meischte am Meer entlang gange isch. Mir sind öpä 4
stund unterwägs gsi. D Nadia hät die ziit gnutzt und hät mit ihrem Mami
gskypet. Es hät voll WLAN im Zug gha. Ich han während däm ebä die schöni
Ussicht gnosse. So simmer etz in Vancouver na bis am Samstig. Dä ersti Idruck
vo dä Stadt isch sehr guet. Isch würkli schön da.
Mir schicked eui chli schöns Wätter (da isch es 25°C und
sunnig).
Und all die wo gli id Summerferie gönd und allne anderne e gueti Zit.
Liebi Grüess Adi&Nadia ohni Sonja
Fötelilink:https://plus.google.com/photos/106485234849145601756/albums/6033827341665463697?authkey=CJubqPuV2sGB...