Aloha ihr liebe dihei.

Mir hoffed ihr gnüssed eui
Summerferie bi schönem Wätter.

Mir sind im momänt uf Maui, Hawaii idä Ortschaft Kihei. Jede
Tag Sunneschi, bade im Meer und eifach wieder mal nüt mache. Mir händ da es
Condo (wie es Appartement) gmietet. Da hämer ä Chuchi wo mer sälber wieder händ
chöne choche. Es isch etz scho 10 Täg her sit mer dä letzti Burger gässe händ.
Als ersts hämer euis nämli richtigi Teigware gmacht. S bescht da isch aber,
dass mer diräkt am Strand wohned. Wämer nid im 1. OG wäred dän wür euis nur en
chline Rasestreife vom Sand tränne. Zu dem ane isch euise Blick richtig Weste,
also jede Abig dä Sunne im Meer versinke zueluege. Eifach Traumhaft. S Meer
isch öpä 25 Grad warm und Luft fasch immer bi 30 Grad.



Bevor mer aber da in Kihei glandet sind, hämmer na einiges
erläbt. Mir sind z letzt ja in Vancouver gsi. Det hämer d Nadia leider en Tag
müsse im Hotelzimmer verbringe. Sie hät am Abig vorher ime Restaurant öpis
gässe wo anschienend nüme guet gsi isch. Ich han idäre Ziit na d Stadt für mich
elei erchundet. Natürli bini ab un zue wieder is Hotel zum go luege ob d Nadia
na läbt. Uf jede Fall hämer dän na ein Tag gha wo mer in Stanley Park gange
sind. Dä isch eifach Risig und au wunderschön. Bi euis wür mer däm eifach Wald
näbed dä Stadt säge aber det isches dä Stadtpark. En Tag später hämer bim Hotel
am 11i us checkt und sind zum Flughafe gfahe mit em Taxi. Euise Flug uf Maui
wär am halbi 4 am Namittag abgfloge, dich bereits bim Check in ischer e
halbstund verspätet gsi. Ja okee isch ja nid so schlimm. Also simmer beziite
mal dur Pass- und Handgepäckkontrolle. Bi däm Flughafe macht mer, sofern mer id
USA flügt, au grad na d Ireis id USA. Das heisst mer händ am Flughafe in
Vancouver scho dä Ireisestämpfel für d USA gha und händ das nöd müesse mache in
Maui. Die wo scho mal id USA greiss sind die wüsset wie lang das chan gah. Wo
mer dän uf dä Flüger gwartet händ isch irgendwänn azeigt worde, das dä Flüger
erst am halbi 9i am abig abflügt. Okee dän wartemer halt chli länger, Maui isch
ja eh namal 3 stund Ziitverschobe mit Vancouver. Dä Nadia han ich na gseit: „muesch
luege dän chömer sicher nid starte will er so spat nüm därf in Maui lande“.
Juhu dä Flüger isch dän äntli am Gate gsi und mir händ öpä am viertel vor 9i
chöne Boarde. Alli sind im Flüger gsässe und scho müed vom warte wo dä Pilot
meint, es gaht namal e knappi stund bis mer abflüget wills na was adä Bremse
müend mache. 10min. später hät er sich namal gmäldet und dä Flug canceled. Und was
ich dä Grund gsi? Er chan so spat nüm in Maui lande will die na am Piste
erneure sin idä Nacht. Dä Flug wird am nächste Morge am 10 abflüge. Naja simmer
halt wider usgstige, wieder i Kanada igreist, euises gpäck gholt und dän hämmer
vo dä Air Canada en guetschi für es Hotel idä nächi becho. Mir sind
schlussändlich öpä am 11i im Bett gsi. Am nächste morge hämer die ganzi
Gschicht mit ichecke, Kontrollene und ireise namal gmacht. Und am halbi 2
Ortsziit simmer dän äntli i euisem Condo acho. Für euis isch das ja kei sach
will mer ja scho in Vancouver gsi sind. Mer händ aber na Schwizer troffe wo vo
Züri über London nach Vancouver und witer uf Maui sind. Die sind rächt
gschlisse gsi a däm Abig wo dä Flug canceled worde isch.



Ja wie scho gseit gnüssemers da uf Hawaii sehr. Mer chan da
nid nur surfe sondern au na schnorchle, tauche etc. Mir sind darum uf ä 4
stündigi Tour zum Molokini. Das isch en erloschene Unterwasservulkan wo aber d
helfti vom Krater usem Wasser lueget. Im Krater sälber häts nur wenig strömig
und darum en hufe Fisch und Koralle. So Krater gits nur 6 mal uf dä Wält.
Speziell isch au na, dass grad usserhalb s Meer ca 30 Meter oder meh tüf isch. Im
Krater inne isches grad mal 10 Meter tüf. Det simmer chli inne und usse am
Krater go schnorchle. Bim zrug fahre simmer na binere Schildkröt Putz Station
go schnorchle. Das isch ä Stell im Meer wo sich d Schiltkröt vo Fisch lönd
putze. Die Schildkröt sind zum Teil so gross wie dä Adi. (Adi übertriibt chli, sind scho gross aber grad so gross wie er sinds denn also scho nid) Mer händ einigi vo
däne gseh. Mega schöni Tier und eifach dä hammer gsi die im Meer so näbed eim
schwümme gseh.
Damits euis nid langwilig wird hämer euis na 2 Täg es Auto
gmietet. Mit däm simer d Road to Hana gfahre, dä Sunneufgang ufem Haleakala
glueget und nachli adä Westküste umgfahre. D Road to Hana isch eifach dä hammer
gsi. Uf däre Site, im Oste, vo dä Insle isches sehr füecht und viel räge. Somit
häts en Rägewald wo mer dä dur fahrt. D Strass isch aber uh mega äng und es hät
soooooo viel Kurve und ewigs gaht die Strass. Im hiwäg hämer überall chli
ghalte und die viele schöne Stränd und Wasserfäll bestuhnt. Leider isch s Wätter
rächt rägnerisch gsi. D Strass ändet idä Ortschaft Hana. Vo det gahts aber na
wiiter in Nationalpark wo die berüehmte Pools vo Ohe’o Gulch sind. Wäns nid
zviel Wasser hät chamer det ganz guet go bade. Leider hämer aber nid chöne
wills halt zviel Wasser gha hät. Schön isches trotzdem gsi. Leider hämer vo däm
Tag nid so viel Föteli wie mer das susch amigs gmacht händ. Tipp a alli
Hobbyfotografe: Immer luege ob d Speichercharte idä Kamera isch! Da sich die
Strass so id längi zoge hät simer am abig rächt gschlisse gsi und fasch diräkt
is bett. Will am nächste morgä simmer am 2 ufgstande. Läck so früeh nur für en
Sunneufgang. Mir sind dän also am 3 abgfahre und 1,5 stund später simer uf 3000m.ü.M
gsi und händ euis dä Arsch abgfrohre. Es sind na öpä na 10 Grad gsi und mir mit
churze Hose. Mer händ immerhin na d Jagge mitgnoh gha. D sunne isch dän am
punkt 5.48 am Morge ufgange und mir händ wunderschöni Föteli gmacht und eifach
d Stimmig gnosse. Will mer das muess gseh ha wän mer in Maui isch simmer nid
die einzige gsi und händ na eine vo dä letze Parkplätz det becho. So ca am 7i
simmer widr zrugg is Hotel gfahre und händ namal e rundi gschlafe. Am Namittag
simmer dän na ad Westküste uf Lahaina. Vo det hämer au wieder en andere Blick
uf d Insle gha. Au hämmer vom Strand us namal e Schildkrot gseh im Meer.
Und so
sitzemer etz am ändi vom Tag da und schribet dä Blog. Vor euis liged etz na 6 Täg wo mer da in Maui gnüssed.
Nacher flügemer uf witer Honolulu wo mer namal 8 Täg Hawaii gnüssed.
Das ja bi eui dihei eh rägnet isches nid so schlimm das er
händ so lang müesse am PC hocke und das läse.

Mir gsehnd euis ja scho gli wieder. Bis det ane macheds
guet.

Aloha Adi&Nadia

 

Fötelilink:
https://plus.google.com/photos/106485234849145601756/albums/6039136369646774417?authkey=COqsncH5w87z...