Hallo alli Zäme

Wie mir das da so mit überchömed händers grad ganz schön heiss idä Schwiz. Hoffentli händers au chöne gnüsse am lange Wucheend.

Mir sind mitlerwile nach fasch 10'000km am Meer in San Diego acho. Leider isch da d Tempratur nur na um die 23°C. S letzt mal simer na bim Grand Canyon gsi. Dä isch scho rächt beidruckend gsi. Wiiter isches dän via Flagstaff uf Las Vegas gange. In Flagstaff simmer na uf dä Husberg wo mer im Winter tatsächlich chan Ski fahre. Miteme lahme Sässeli simmer uf über 3400m.ü.M innere halb Stund gfahre. Es isch ganz guet gsi wills so höch obe chli chüel gsi isch, das isch aber euis au zum verhängniss worde und mer händ euis voll verbrännt ufem Sässeli. Nachere Nacht in Flagstaff simmer wiiter uf Las Vegas gfahre wo en Teil uf dä alte Route 66 gsi isch. Churz vor Las Vegas isch na dä Hoover Dam uf em Programm gstande. Dä hämer churz und knapp bi knapp 40°C bsuecht. Wiener uf dä Föteli gsehnd häts det scho länger nüm grägnet. E stund fahrt wiiter simmer dän in Las Vegas i euisem Hotel Excalibur am Strip acho. Erschlage vo däre Hitz simer wiiter erschlage worde vo dä Dimension vo däm Hotel. Eifach nöd normal. Alles isch risig gsi. In Las Vegas simmer natürli alles chli go aluege und händ eifach gstuhnt ab däm Wahnsinn. Däm Wahnsinn hämmer euis hi gäh und chli zockt, viel gässe, fuhl umegläge und uf d Achterbahn im New York New York Hotel, so wies da halt alli gmacht händ. Nach drü Übernachtige in Vegas simmer froh gsi wider us dä Stadt use zcho. dä Nächsti halt isch Yucca Valley gsi wo mer eimal gschlafe händ und am nächste Tag in Joshua Tree National Park sind. I däm Park isches eifach namal heisser gsi als mer das scho gha händ. S spezielle a däm Park isch, dass det zwei verschiedeni Wüesti ufenand träffet und nur det dä Joshua Baum git. Dä Park isch au sehr idrücklich gsi. Nachem Park isches dän diräkt wiiter gange uf San Diego. D Fahrt isch namal es high light gsi da fasch die ganz Strecki mind. 4-spurig i ei richtig (max. 10 Spure) gsi isch und jedi Spur isch voll Auto gsi. In San Diego simmer bis etz uf em Flugzügträger USS Midway gsi wo etz es Museum isch. Au rächt beidruckend die Dimensione. Da dä Adi nie zum Coiffeur isch hämer euis na e Haarschnidmaschine kauft und na Haare gschnitte im Hotel. Am zweite Tag in San Diego hämmer s Sea World bsuecht. Das isch eigentlich en Zoo für Meerestier aber es hät viel meh Show mit Tier und Achterbahne, also eher en Vergnüegigspark. I dän hämmer Orca-Show, Delfin-Show und Seehund-Show gseh und en huufe Tier susch na gseh. Bsueche duet mer dä Park wäge dä Orcas, Delphin und sicher au wägem Heibecki. Also dä bsuech hät sich glohnt.

Dä letzti Tag in San Diego verbringemer na im San Diego Zoo mit über 3000 Tier eine vo dä gröste Zoo wält wiit. Nach San Diego gahts dän wiiter is Disney Land und uf Los Angelas.

So mir hoffet mer händ eu nid erschlage mit z viel Text und dä vielne Bilder. Mir wünsched allne e geuti Wuche und e schöne Ziit.

Viel Spass und liebe grüess 

Adi und Nadia

Föteli-Link:
https://plus.google.com/photos/106485234849145601756/albums/6022753589909953249?authkey=CNvGpL3ZhrC9...