Hallo alli Zäme

Wieder isch scho e Wuche ume und mir händ i däre Ziit wieder viel erläbt und gseh.
Agfange hät sie am Mäntig mit em Arches NP. Leider häts mega viel Lüt gha, will da idä USA dä Memoryal Day gfiret worde isch. Da händ fasch alli Frei a däm Tag. Dennoch hämmer dä Arches NP mitere 2,5 stündige Wanderig bi ca. 28°C chöne gnüsse. Und wills so schön gsi isch hämmer dä Tag bimene feine Nachtässe mit Ussicht uf dä Coloradoriver chöne abschlüsse. Dä Adi hät s erst Mal Bisonfleisch gässe was sehr fein gsi isch. Am Ziistig isches wiiter gange is Monument Valley wo im Navajo Indianer Reservat isch. Es isch nöd es eugentlichs Tal aber verschiedene Monument stönd halt so dete. Mer chan mit em Auto det au dure fahre. D Strass isch aber kei richtig Strass sondern chli Sand und Chiis wo sehr viel Schlaglöcher gah hät. So hämmer nur grad d helfti vo dä Strecki gmacht will euses Auto das sicher nüm lag mitgmacht hetti. S Auto hät etz na Sandstaub dra. Mir sind dän is Hotel und am Abig na dä Sunneuntergang wieder im Monument Valley go aluege. Am Mittwuch simmer is Navajo Monument wo mer vo wiitem so Lehmhüsli vo däne Indianer hät chöne bestuhne. Händ usgseh wie so Miniatur Hüsli. Wiiter simmer na nach Page gfahre und det im Lake Powell go Bade. Am Dunnstig isches leider nid so schön gsi und dä Adi hät sini Schultere vercheltet gha. So simmer chli in Walmart go poste und alles womer in Page chan aluege go aluege. Eigentlich hämmer na welä in Antelope Canyon doch das lohnt sich für 40$ pro Person bi schlächtem Wätter definitiv nid. Au hämmer na dä Sunneuntergang am Horseshoe Bend aglueget. Hüt Friitig isches viel schöner gsi als es im Internet azeiget hät. Dä Adi hät a sonere Tour für dä Antelope Canyon aglüte und grad na zwei plätz chöne reserviere. (Mer chan nid elei idä Canyon, es git nur gfüerti Toure). So simmer na in Antelope Canyon am Morge und am mittag dän in Grand Canyon gfahre wo mer jetzt euses Hotel für zwei Nächt händ.

Leider hämer am dunstig gmerkt, dass mer scho 4 Wuche unterwägs sind. Die Ziit da vergaht viel z schnäll......

So und ihr därfed jetzt na euisi Föteli gnüsse. Viel Spass und liebi Grüess

Adi und Nadia

Föteli-Link:
https://plus.google.com/photos/106485234849145601756/albums/6019400160217524993?authkey=CKeE8cro6dOr...