Hallo ihr liebe dihei


Es isch wieder e Wuche ume und mir händ en hufe erläbt und gfötelet. Da isch dä Foti-Link:
https://goo.gl/photos/R7myy6ACBZKfoyKK9



Letzt Wuche simmer am Mäntig vom sunnige Wanaka richtig rägnerischem Franz Josef Village gfahre. Nach ca 1 Stund fahrt simmer anere Schafherd begägnet. Also das heisst mir händ zersch müesse hine na fahre und dän zmizt dedur. Isch na witzig gsi und mir händ ja dä Ziit gha. Bald isch dän dä Räge cho und mir sind über dä Haast Pass gfahre. Dä isch sehr unspektakulär gsi, grad ue und grad wieder abe. Adä Westküste acho hämer in Haast sälber en Halt gmacht und Zmittag gässe. Vo det hämer na en chline abstächer 48km zur Jackson Bay gmacht. Dä Ort isch gmäss Lonely Planet dä einsamsti Ort in ganz Neuseeland. Das isch er au würkli gsi. Mir sind euis wie scho oft da in Neuseeland am ändi vo dä Wält vor cho. Mir sind vo det dän adä Westküste zum Franz Josef Village, ca 2 Stund fahrt, gfahre. Unterwägs hämer amene Strand und amene Ussichtspunkt halt gmacht. Es hät det wieder mal en hufe Sandflüge gha wo euis gstoche händ. Die Flüge hämer etz scho öpä erläbt und wänn die Stäched, nur d Wiibli, dän duet das rächt weh und es biiist eim für die nächste zwei Wuche. D Nadia verwachet immer na idä Nacht zum sich chratze bi dä Stich. Franz Josef Village isch grad eifach es Dorf für Touriste wie mir. Will dä Adi s gfühl gha hät, dass mir viel Ziit bruched zum dä Franz Josef Gletscher und dä Fox Gletscher z erchunde hämer simmer det 3 Nächt blibe. Am Ziistig, am erste Tag det, isch na am schönste Wätter gsi mit chli Sunne und abem Mittag bewölkt. Drum hämer euis entschlosse a däm Tag beidi Gletscher z bsueche. Zum Franz Josef Gletscher lauft mer ca 45min und zum Fox Gletscher ca. 30min, jewils vom ihrem Parkplatz us. Bim Franz Josef, wo mir zersch gmacht hämd, isch es e rächti entüschig gsi. Dä Gletscher isch eifach en Gletscher und nächer als 750m häsch nid chöne drahere. Mir hetted vielicht 10 Jahr früehner müesse cho dänn wäred die Gletscher chli nächer na am Meer gsi. S einzige wo für euis Speziell gsi isch, isch dass die Gletscher nur 300m.ü.M. sind. Susch sind das eifach Gletscher. Und ja es git da tatsächlich Lüt (viel lüt) wo fasch 300Fr. zahled zum mit em Heli uf dä Gletscher z flüge. Mir händ da diräkt ad Skiferie müesse dänke und wie mir mit dä Ski über dä Gletscher fahred und dä Gletscher chönd bestuhne. Dä zweiti Tag häts dän nur gschiffet gha. Mir sind glich ä chlini Wanderig vo 1.5 Stund go mache aber däbi völlig verschiffet worde. Dä rest vom Tag simmer chli im Zimmer gsi wills susch kei anderi Schlächtwättermöglichkeite i däm Dorf gäh hät. Spontan hämer für dä Abig/Nacht na e Tour buechet zum in Wald go Kiwis sueche und aluege. Leider häts z fesch grägnet und die Tour isch abgseit worde. Am Dunnstig isches dän Wiiter 3 Stund fahrt nach Westport gange. Über d helfti vo dä Strecki häts wieder grägnet und ersch dän hämer wieder mal d Sunne gseh gha. E halb Stund vor Westport sind die Pancakes Rocks am Meer. Die simmer natürli au na go aluege. Es gseht würkli fasch so us als wäred en hufe Pfannkueche ufenand gstaplet worde. In Westport hämmer s erst mal in Neuseeland Fleisch ufem heisse Stei gässe. Das isch für die Lüüt da na öpis ganz speziells nüm so wie bi euis. Mitlerwile isch scho wieder Friitigmorge gsi und mir händ wieder mal Räge gha. In Wesport simmer namal e Seeleuekollonie go aluege und händ euis dän uf dä Wäg richtig Motueka gmacht. Das sind wieder öpä 3 Stund fahrt gsi dur es ganz schöns Gebiet. Aber ebä leider häts dä ganzi Wäg gschiffet. Churz vor Motueka häts dän ufghört und d Sunne isch wieder füre cho. I däm Dorf hämer 4 Nächt innere Feriewohnig buechet wo mir chönd sälber choche. Drum simmer zersch go Poste. Sitt det hät etz au euises Auto en chratzer. Irgendöper isch, während mir am poste gsi sind, i euises Auto gfahre und dän eifach wäg gange. Isch im erste Momänt grad e chli en Schreck gsi für euis. Mir händ dän gseh, dass dä Parkplatz mit Kameras überwacht isch und sind die nettte Fraue vom Lade go fräge, ob sie chönd luege wär i euises Auto gfahre isch. Sie händ dän gseh was für es Auto das gsi isch und euis d Autonummere ufgschribe. Mir händ dän na churz bi dä Autovermietig aglüte und gfräget ob das langed oder ob mir da na Polizei bruched. Die händ nur gmeint, wänns na fahrt und mir e Vesicherig händ dän isch das keis Problem. Mir hoffed, dass es dän bim abgäh vom Auto würkli keis Problem isch. In Motueka hät dä Wätterbricht fürs ganze Wucheend wieder mal Räge vorus gseit. Dä Samstig isch aber viel Schöner gsi und mir sind dän zu dä Golden Bay gfahre wo es ganzes Gebiet nördlich vo Motueka isch. Das isch so öpä dä nördlichsti Teil vo dä Südinsle. Da isch unteraderem die grössti Süesswasserquälle vo Australasie wo 14'000l pro Sekunde use sprudlet. Es isch dän doch na cho rägne cho aber will mir chli umegfahre sind hämer euis immer grad wieder chöne zu dä Sunne flüchte. Und etz isch Sunntig und s Wätter isch würkli wies gseit händ nid so guet. Mir händ darum wieder mal Wösch gmacht und schribet dä Blog. Mir gönd glich na zum Split Apple Rock wo nur bi Ebbe chasch ane und ca 30min mit em Auto vo Motueka entfernt isch.

Für die nächsti Wuche hämer na e Tour im Abel Tasman Nationalpark buechet und mir fahred am 1. Dezember wieder mit dä Fähre uf d Nordinsle. Det simmer na bis am 7. Dezember.

Mir wünsched allne en schöne 1. Advent. Bi euis isch Früehlig und Wiehnachte na gaaaaaanz wiiiiiiit wäg.

Liebe Gruess

Adi & Nadia