Liebe Familie und Freunde

Mir sind mittlerwile wieder uf dä Nordinsle vo Neuseeland und händ namal wunderschöni Sache erläbt.
Fötelilink: https://goo.gl/photos/MfsPXY4EZJzXDs1F9


Nachem letzte Blogitrag simmer am Mäntig mitere Tour dä Abel Tasman Nationalpark go erchunde. Die Tour isch miteme Boot adä Küste vom Park gange und so hämmer all die wunderschöne Stränd chöne bsuche. Susch müesst mer ca 3 Täg laufe zum alles gseh. Dä Park isch zwar dä chlinsti in Neuseeland aber sicher eine vo dä schönste. Euise Tourguide isch en Studierte Vogelkundler gsi und hät zu allem öpis chöne verzelle und mir händ wieder viel neus erfahre. Uf däre Tour hämer dän au äntli en Blue Penguin, die chlinsti Art vo dä Wält, gseh. Somit hämer dank däre Tour fasch alli Vögel und Tier wo mer muess gseh ha gseh. En Tag später hämer euis namal z Fuess in Abel Tasman National Park gmacht und sind ca 1 Stund bis zum erste Strand gloffe. Leider isches chli bewölkt gsi und euis händ die dumme Sandflüge wieder plaget. Mir sind nach däm dän uf Nelson gfahre. Die Stadt isch chli und herzig und hät euis rächt guet gfalle. Det simmer ine alti Chile wo etz ä Bar isch und händ euis es Bier gönnt. En Tag druf simmer na zum Mittelpunkt vo Neuseeland gloffe. Dä isch in Nelson ufeme Hügel und gaht öpä e halb Stund zum ue laufe. Det simmer nid nur im Mittelpunkt gsi sondern händ au en wunderschöne Blick uf Nelson gha. Es ish nid dä geographisch Mittelpunkt aber irgendwie dä wo alli ane gönd. Nach däm simmer witer gfahre uf Picton. Die Fahrt wär wunderschön gsi aber leider häts Wätter wieder mal nit mitgmacht. In Picton acho hämer na euise chli Schade am Auto zeiget und sind dän am nächste Tag uf d Fähre wieder zrugg uf d Nordinsle. Dasmal isch s Wätter nid schön gsi uf dä Fähre und ufem offnige Meer häts rächt gschauklet. In Wellington acho isches wieder schön gsi und herlichi 20°C. Det hämer euises neu Auto abgholt und sind dän vo der na 4 Stund uf Ohakune gfahre. Dasmal isches en Kombi womer becho händ. Ohakune liet idä nächi vom Tongariro Nationalpark, isch d Rüeblihauptstadt und hät es Skigebiet. Rüebli will da wäge dä Vulkanerde s Gmüess so guet wachst und die Ihwohner mega stolz druf sind. Mir händ im Nationalpark welä ä tägigi Wanderig mache aber leider isch s Wätter nid so guet gsi. Drum hämmer ä chlineri Wanderig gmacht und die zwei Skigebiet bsuechet. Skigebiet händ natürli kei Saison meh gah aber d Ussicht wär wunderbar gsi aber leider isch au da s Wätter ja nid guet gsi. A däm Abig hämer euis na welä sälber uf d Suechi nacheme Kiwi mache und sind darum namal in Nationalpark gfahre und sind det knapp 5 Minute in Wald gloffe. Leider häts aber nur Wildschwein gah und mir sind schnäll wieder dihei gsi. En Tag druf isch das cheibe Wätter eifach immer nanig besser gsi und mir sind dän diräkt nach Taupo gfahre. Det hämmer d Huka Falls bsuecht und i heisse Quälle ime Park go bade. Am nächste Tag hämer na ä Schifftour ufem Lake Taupo buechet und sind mit em Boot uf däm umegfahre und händ d Maori Rock bsuechet. Dä Adi hät die fahrt bi schönem Wätter nid so chöne gnüsse willer sich irgendöpis igfange hät. Nach däm lässige Schiffli fahre simmer na 2 Stund zu dä Waitomo Caves gfahre. Da simmer etz imene Hotel wo wie es Märlischloss usgseht. Dä Adi hät sich uskuriert und mir sind hüt uf Otorohanga in en Vogelzoo wos unteranderem au Kiwi's gah hät. Mir händ dä grössti gseh wos idä Natur chan gä und sind sehr überrascht gsi wie gross die chönd wärde. Je nach Art sinds au chliner. Zu däm hämmer na Baby Kiwi gseh, ca 2 Jahr alt, und na en hufe anderie Vögel wie dä Kaka, Kea, Weka, etc.

Und so simmer etz da fasch am Abschluss vo euisere Neuseelandreis und händ na eis Highlight vor euis. Morn gömer id Waitomo Caves wo so Glüehwürmli hät. Und bereits am Mittwuch sitzemer im Flüger nach Fiji und gnüsses det euisi Flitterwuche. Det häts nur begränzt Internet und Handyempfang scho gar keine drum ghöred ihr dän bis mir in Sydney sind nüt meh vo euis.

Allne e schöni vor Wiehnachtsziit

Adi & Nadia