Liebe Fründe und Familie
Sitt euisem letze Blogitrag isches es wili här. Bevor mir nächste Friitig wieder in Züri landet und euis dä herti Alltag vo dä Wiehnachte iholt, schribed mir da namal dä letzti Blog vo euisere Flitterreis. Wär gar kei lust hät uf läse und nur will Föteli aluege söll doch grad da uf dä Link klicke:
https://goo.gl/photos/QPvC8k1ZzYebkSL79


Vor fasch zwei Wuche simmer na in Neuseeland gsi. S letzte wo mir dete na bsuecht händ sind die berüehmte Waitomo Caves gsi. Das sind risigi Höhlene wo en Fluss dure flüsst. Darum häts det au so Glüehwürmli wo eigentlich kei sind sondern nur ihre Fade wos abelönd zum Flüge etc fange wo lüchtet. Es git wie gseit mehreri Höhlene und idä erste gits eifach nur die Würmli zum aluege. Da mer det kei Föteli därf mache simmer na ine anderi Höhli wo viel intressanter gsi isch und wo mer au hät därfe Föteli mache. Die ersti Höhli wird sitt 125 Jahr komerziell gnutzt und die zweiti ersch sit 10 Jahr. Nach däne Höhlene isches dän na am gliche Tag, Ziistig, witer gange nach Auckland an Airport. Det hämer euises Auto abgäh und namal e Nacht ime Hotel am Flughafe gschlafe. Als letzt Znacht in Neuseeland hämer euis na dä Angus Beef Burger im McDonalds gönnt. Am nächste Morgä bim i checke am Flughafe hämer zersch mal müesse stuhne. Es git det kei Personal meh zum Koffer i checke. Nur na es paar Fraueli wo der häfed wän dä Automat nid richtig funktioniert. Ich nimme a das wird bi euis in Züri au gli so si. Vorem Abflug hämer na es chlises Zmorge gha und dä Adi hät sich na es Hämd kauft für zum e chli chic usgseh in Tokoriki. Dän simmer abgfloge nach Nadi, Fiji. Mir sind mit Air New Zealand gfloge und ich muss eifach säge, dass das e super Fluggsellschaft isch. Viel beifreiheit und e rise Uswahl zum Film luege, sogar uf dütsch. In Fiji acho simmer fasch vergange vo däre Hitz da. Es sind ca 32°C gsi und mir händ na langi Hose agha. Vom Flughafe händs euis abgholt und mir sind zum Heliport gfahre grad näbed em Flughafe. Det hämer na ca. 20min müesse uf dä Heli warte. Mir sind ä chli ufgregt gsi will mir na nie Heli gfloge sind. Dä Adi hät därfe vorne näbed em Pilot sitze und d Nadia hine. Dä Flug zu dä 36km entfernti Insle ca 20min gange. Es super Erläbniss. Uf Tokoriki glandet simmer au scho herzlich begrüesst worde. Zum Afang häts zersch es Willkommenslied gäh und en Drink. Die vom Hotel händ na irgendwelichi Sache gschwaflet und mir händ eifach nur weläs is Hotelzimmer, Badhose alege und ab i euise chline private Pool. Das hämmer zum Glück na vorem Hitzetod gschafft. Und so händ euise 10 Täg Flitterwuche agfange und leider sinds au scho wieder verbie. Mir hetted det ewig chöne blibe und gnüsse. Euise Tagesablauf isch in etwa so gsi, dass mir am 9i sind go Zmorgä ässe, am 4i go Kaffi näh, aschlüssend es paar Meter schwümme und am halbi 7i id Happy Hour und dän diräkt go Znacht ässe. Mir sind meistens am 10i scho wieder im Bett gläge und händ wunderbar gschlafe. Zwüsched dure simmer i euisem eigene Pool go bade, händ gsünnelet, gschlafe und Büecher gläse. Das Willkommenslied vom Afang hämer gfühlti 1000 mal ghört will immer wieder öper mit em Heli, Wasserflugzüg oder Schiff acho isch. Es hät au jede Abig für die wo am nächste Tag wieder gange sind es Abschiedslied gäh. Es isch eifach herlich gsi. Leider häts immer wieder grägnet und nur 3 vo 10 Täg sind richtig sunnig gsi. Aber egal mir sind richtig entspannt gsi. Leider häts sich idä nächi, ca 300km vo dä Insle entfernt, en Sturm afange ufbaue. Sie händ na angst gha das es chönti en Zyklon werde (Wirbelsturm). Dadurch isch abem Dunnstig gar kei sunne meh gsi und nur na Wind und Räge. Will mir ja am Samstig händ wieder müesse abreise simmer am Fritig morge mal go fräge, wänn dän eusie Heli zrugg uf Nadi flügt. Die netti Dame hät euis dän mitteilt, dass am Samstig na kei Helikopter oder Fähre bestätigt sind wägem Sturm. Da mir euise Flug vo Fiji uf Sydney nid händ welä verpasse und keis Risiko igah hämer euis dän entschiede, die Fähre am gliche Tag am Nammittag am 4i znä. Für das hämer na es Hotel müesse in Nadi organisiere für ei Nacht. So hämmer also müesse die sehr schöni Insle vorzitig verlah. Mir sind nöd die einzige gsi wo früehner gange sind. Ä Managerin wo au na uf dä Insle gsi isch, isch au mit euis früehner gange. Somit isch euise entscheid sicher richtig gsi. D Fahrt mit em Schiff hät über ä Stund duret und dän simmer ersch in Daresanau acho und vo det namal 20 min. mit em Bus bis zum Flughafe wo euises Hotel gsi isch. Au da häts nur grägnet und nach däm wunderschöne Ufenthalt uf dä Insle Tokoriki isch das wie ä Fust is Gsicht gsi. Tja da simmer wieder zrugg im Läbe. Mir händ dän also dä ganzi Samstig in Nadi am Flughafe verbracht will euise Flug ersch am halbi 7i am Abig gsi isch. Dä Abflug in Nadi mit dä Fiji Airways isch dän au sehr rucklig gsi und es isch sehr lang gange bis mir dur d Wulche gsi sind und sich s Wätter beruhigt hät. In Sydney acho isch defür alles richtig schnäll gange. Da mir en elektronische Pass händ hämer nur amene Automat euise Gsicht müesse zeige und scho simmer in Australie igreist gsi.

So simmer etz na 5 täg  in Sydney und erkundet na die Stadt bis am Dunstig bevor mir dän is Flugzüg uf Züri stiged.

Bis bald
Adi & Nadia