Liebi Fründe wo dihei blibe sind.


Mir sind etz scho fasch e wuche vo dihei wäg und unterwägs. Für all wo nöd wänd läse da isch dä Fötelilink:

https://goo.gl/photos/8xpbS5aBfgCEPycn8

S' erste Highlight isch s Business flüge gsi. Zersch hämer chöne id Businensslounge am Flughafe Züri, im A380 uf Singapur häts Zmittag und Zmorge mit jewils 3 Gäng gäh. Zum Zmittag häts Rindfleisch ca 150Gr. gäh. Eigentlich hettemer rächt entspannt sölle in Singapur acho. Durs schlafe und das viele Ässe isch euis aber beidne nid so wohl gsi. Drum simmer froh gsi hämer chöne wieder id Businesslounge in Singapur am Flughafe. Nach 2 Stund ufenthalt simmer mit dä Air New Zealand wiiter uf Auckland gfloge. D Nadia und ich händ dän zersch mal e rundi gschlafe. I däm Flüger hät sichs viel besser gschlafe als im A380. Das isch scho sehr cool wämer richtig chan liege im Flugzüg zum schlafe. In Auckland glandet simmer rächt easy und schnäll dur Passkontrolle und na dur d Gepäckkontrolle. So simmer bereits 12i idä Nacht im Hotel gsi und hät det wieder chöne schalfe.

Am nächste Tag isch scho Mittwuch gsi und mir händ fasch usgschalfe d Stadt chöne miteme Hopp on Hopp off Bus erchunde. Mir sind ufem Mount Eden gsii wo mer die ganzi Statd und na viel meh gseh händ. Au simmer am Mission Bay s erst mal as Meer. Nachemem Mittagschlaf im Hotel hämmer euis nachli dä Reis gwidmet und sind am Abig im Hotel go Burger ässe. Am Dunnstig hämer namal d Stadt erchundet und sind go Hose für dä Adi poste. Er hät nur ei Hose mitgnoh und die ander vergässe ipacke. Scho am Friitig simmer go s Auto hole und richtig Paihia gfahre. Es isch rächt speziell so links fahre aber mer gwönnt sich schnäll dra. Unterwägs hämmer na d Whangarei Falls gse. Gseht uf dä Bilder spektakulär us vor Ort isches nid so dä Wahnsinn. Paihia hät euis sehr guet gfalle. Isch es chliises Dorf am Meer wo rächt useputzt isch. D Fahrt dä Küste na und all die Kürvli sind scho rächt asträngend. Dä Nadia wird's amigs fasch schlächt. Am Samstig simmer as Cape Reinga gfahre. Nöd ganz dä nördlichst Punkt aber es hät en Lüchtturm und alli Touriste gönd det ane. Dä wäg isch wieder rächt kurvig gsi und hät euisi volli Konzetration verlangt. S Wätter isch sehr schön gsi ca. 16°C aber sehr windig. Mir händ euis drum scho d Nase verbrännt. Und hüt simmer zu dä Kauri Trees. Die wärded rächt gross, gits nur in Neuseeland und gits nüm so viel. Es isch au en rächte Schwächling will sini Wurzle sehr näch adä Oberflächi wachsed und die darum wämer druf tramped sehr schnäll kaputt gönd. Di 4t grösst Masse vo Baum hämer dän gseh. Sehr idrüklich gsi. Wie jede Tag bim fahre hämmer viel Schääääfli, Chüe, toti Tier uf dä Strass und en hufe Landschaft wo niemert isch gseh

Wiiter gahts morn richtig Hahai wo mer zum Hot Water Beach und wiiter richtig Südinsle fahred.

Macheds guet und bis gli

Adi & Nadia